Ni BRENDA S. DACPANO
www.nordis.net

Itlog ti kalakaan a lutuen ken mayat a paggapuan ti protina. Perfect a para armusar ta mabiit nga isagana ken readily available ta magatang iti uray babassit a tiendaan wenno sari-sari store wenno iti baki idiay likod ti balay.

ITLOG. Photo ni Brenda S. Dacpano

Saan ko a maibaga no ania ti perpekto a pannakaluto ti binatil nga itlog ta segun dayta iti mangan. Adda dua a klase ti panagluto iti binatil. No kayat yo ti nalukneng ken moist masapul nga innayad ken nakapsot ti apuy a pangluto. Ngem no kayat yo ti namaga ken medyo natangken, iluto iti napigsa nga apuy. Ti nasken ditoy ket husto ti pannakabatil ti itlog. Maibaga a mayat ti pannakabatil na no agpapadan ti kolor na ken adun ti angin na. Batilen iti dakkel a malukong babaen iti wire whisk wenno tinidor (no awan ti whisk). Iluto iti non-stick pan wenno pariok iti 1 kutsara a mantika/butter wenno ad-adu pay no agusar ti pariok.

Inlambong nga itlog

Malasado wenno soft-boiled egg. No agusar ti itlog a naggapu iti refrigerator kasapulan a bay-an pay iti room temperature iti 30 minutos sakbay nga iluto tapno maliklikan ti panagbettak ti itlog. Ipapudot ti kaguddua kaserola a danum wenno aginggana malipus ti agarup maysa pulgada ti itlog. No dadanin agburek ti danum innayaden nga ipisok ti itlog babaen iti panagusar ti dakkel a kutsara wenno aklo. Ilambong iti tallo a minutos ti medium-size (uppat a minutos ti large-size ken lima minutos ti extra-large) nga itlog santo adawen ken iyuper iti nalamiis a danum iti 30 segundo.

Hard-boiled egg. Iti kaserola, ikabil ti itlog, bukbukan ti danum aginggana malipus ti agarup maysa pulgada ti itlog. Ipaburek iti innayad iti maysa a minuto santo patayen ti apuy. Kaluban ti kaserola iti 15 minutos. Adawen ken iyuper iti nalamiis a danum iti 30 segundo. No malabes ti pannakalambong ti itlog ngumisit ti aglawlaw ti duyaw a paset (eggyolk) ti itlog. Naimas nga aramiden nga egg salad wenno palaman iti tinapay.

Poached egg. Ti poached egg ket inlambong met laeng ngem awan ti shell na. Agusar ti pinaka-fresh nga itlog a saan a nabaybayag ngem maysa a lawas tapno saan a nalaka a mabettak ti yolk. Iti kaserola wenno pariok, pagbureken ti agarup tallo pulgada a danum. No nagbureken ti danum, pakapsoten ti apuy. Timplaan ti danum iti asin ken maysa kutsara a suka tapno agtalinaed ti porma a nagbukel ti itlog. Bettaken ti itlog iti bassit a malukong santo innayad nga itinnag iti agburburek a danum. Mabalin a paggigiddanen nga iluto ti tallo nga itlog wenno nasursurok pay no dakkel ti paglutuan. Iluto iti 3-5 minutos. Adawen babaen iti aklo nga adda abot na ken ikabil iti ice water wenno nalamiis a danum tapno saan a malabes ti pannakaluto daytoy ken maikkat ti raman ti suka. Iparabaw iti hand towel tapno maingsetan ti danum na. Iserbi a natimplaan ti asin ken paminta. Mayat nga iparabaw iti ensalada a nateng wenno palaman iti tinapay.

Pinirito / estrellado / sunny side-up

Kabiitan a luto daytoy ken saanen a kasapulan ti adu a ramit no di ti pariok ken syansi laeng. Ipapudot ti non-stick pan wenno pariok. Patedtedan ti maysa kutsara a mantika (wenno butter), ad-adu ti kasapulan a mantika no saan a non-stick pan ti usaren. No pimmudoten ti mantika, innayad nga ipettak ditoy ti itlog.

Iluto iti maysa a minuto. Para iti malasado a pannakaluto ti egg yolk, iluto iti maysa pay a minuto. No kayat yo ti medium-cooked, kaluban ti pariok iti agarup maysa a minuto tapno mapasengngawan ti yolk.

Inasin nga itlog

Agusar ti 9 nga itlog (pato wenno manok), 2 litro a danum, 1 ¼ tasa nga asin, 1 kutsara a paminta, buo (optional) ken 1 kutsara a tapuy, brandy wenno whiskey (optional).

Ugasan dagiti itlog. Ipaburek ti danum ken ikanaw ditoy ti asin agingga marunaw santo pabaawan. Ilaok ti arak ken paminta (no agusar). Ikabil dagiti itlog iti dakkel a garapon wenno enamel pot (saan nga agusar ti aluminum wenno aniaman a metal). Ibukbok ditoy ti danum a naasinan agingga malipus dagiti itlog. Padagsenan dagiti itlog tapno saan nga agtapaw ken agtalinaen a nakauper. Kaluban ti garapon ken ikabil iti paset a nalamiis (saan nga iti uneg ti refrigerator) ken lugar a saan a mainitan. Urayen iti 3 a lawas sakbay a mangilingta ti maysa tapno pangpadasan no mabalinen. No saan pay a nayadi iyuper pay iti maysa a lawas. Maamuan nga husto ti asin a naikabil no mangitinnag ti innapuy iti naasinan a danum ket agtapaw.

Tips maipanggep iti itlog

Panangipakni. Ikabil iti tray iti itlog nga akinbaba ti paset ti itlog a natirtirad gapu ta ti pwesto ti yolk ket adda ditoy. No pabaluknog (akinbaba ti madapdaplat a paset), makulog ti itlog ket mabalin a mabettak. Ti presko nga itlog ket agbayag laeng iti maysa a lawas iti room temperature. No maikabil iti refrigerator mabalin nga agbayag iti 2 agingga 3 lawas.

Panagkita iti fresh nga itlog. Ti fresh nga itlog ket bassit ti linaon na nga oxygen, nadagdagsen ken nairot ti panagkapet ti eggwhite iti yolk isu a no pettaken daytoy ket natambok ti yolk kumpara iti daanen nga itlog a nalaglag-an ken saanen a natambok ti yolk no pettaken ti itlog. Naduyduyaw pay ti yolk ti fresh ngem ti daan nga itlog. Nakerkersang ti shell ti fresh nga itlog. # nordis.net