Apayao nagselebrar ti Aldaw ti kababaihan
2 MIN READ
By LETTY SIBUMA
www.nordis.net
CONNER, Apayao — Idi Marso 18 dagiti babai a kameng ti Save Apayao People’s Organization (SAPO) tek nangangay iti maysa nga aktibidad para kadagiti babbai ken panangselebrar ti International Working Women’s Day.
Tinawen a maangangay ti selebrasyon iti nadumaduma a nasyon ti International Women’s Day kas panang-bigbig iti karbengan ken kalintegan dagiti babai. Daytoy a selebrasyon ket tinawen a maangay iti bulan ti Marso, “Women’s Month.”.
Ti SAPO ket maysa nga organisasyon ti umili a nabukel idi umuna a Mining Forum idiay Manag, Conner, Apayao idi July 5-6, 2005. Itaktakder ti organi-sasyon ti pannakaaywan ti daga, danum ken ti biag. Saksakupen ti organisasyon ti intero a probinsiya numan pay iti munisipyo ti Conner ti pagtigtignayan na.
Babbai agriing ka!
Dagiti delegados ti SAPO a nag-atendar iti women’s day celebration a naangay idiay syudad ti Baguio idi March 7-8, 2011 ket nangbukel ti plano a mangisayangkat iti maysa a programa para iti grupo ti babbai iti SAPO ditoy probinsiya.
“Panawenen a mangisa-yangkat tayo met ti maysa nga abante a women’s day,” kuna dagiti kameng ti SAPO. Awan ti duadua a nagplano ken nangporma da iti maysa a selebrasyon.
Pambungad ken umuna a parte ti programa ket iti panagmartsa dagiti nasurok dua gasut a babbai manipud iti nadumaduma a barangay ti Conner. Naibandera dagiti streamers bayat ti panagmartsa ken nakasuot iti nainsigudan a kawes dagiti delegados a mang-irepresentar kadagiti tribu a naggapuan da. Karaman dagiti Isneg iti Apayao, Kalinga, Kankanaey, Malaweg iti Cagayan ken Itneg ti Abra. “Abante Babai Palaban Militante!” impukkaw dagiti delegados iti laksid iti bara ti init ti agsapa. Nagrugi ti martsa manipud Malama sentro nagturong iti ASC gymnasium idiay Kubet, Malama.
Nailanad iti mensahe dagiti dua a ministro ti simbahan a nangibingay ti biblical a paka-istoryaan dagiti babbai. Da Rev. Arlene Ganotice iti Epsicopal Church of the Philippines (ECP) ken Pastor Yani iti United Church of Christ in the Philippines (UCCP). Maysa kadagiti mensahe a naibingay da,“ ni Eba ket pinarsua ti Dios manipud iti bakrang ti lalaki nga Adan. Kayat na a saoen ti lalaki wenno babai ket agkuyog ken agpada ti pwesto na. Patas ti lalaki ken babai iti karbengan da.” Naibingay a ti babai ti ad-adda a mangkitkita nu kasanu ti sasaaden ti pamilya manipud makan, salun-at ken edukasyon.
Naka-iyaramid met iti maysa a workshop kas paset ti programa mainaig iti sasaaden ti babbai. Kas resulta, naiparuar a ti babai ket ad-adu ti akem na.
Nagmayat a buyaen nu ti babai ken lalaki ket agtinnulong iti amin nga aspeto ti panagbiag. Mababalaw dagiti tradisyonal wenno ti panagbuya a ti babai ket pangbalay laeng, ta ti aktwal a pasamak ket saan a pudno gaputa ti babai ket tumulong iti talon wenno uma. “Babai ka laeng” kuna ni lalaki nu panawen ti panagdesisyon. Masapul a bigbigen a ti lalaki ken babai ket naparsua a parehas iti imatang ti Dios. Babai bumangon ka!
Dagiti kababaihan ti SAPO ket agtultuloy nga agtrabaho para iti tuloytuloy a panagdur-as ti organisasyon ken iti pagsayaatan ti kaaduan, para iti kapia ken pudno a hustiya. # nordis.net
