By KATRIBU PRTYLIST, CORDILLERA PEOPLES ALLIANCE-KALINGA and TIMPUYOG DAGITI MANNALON TI KALINGA
www.nordis.net

Agtultuloy ken saan a nainkalintegan ti nangisit a propaganda ti 21st ken 77th IBPA ti 5th ID ken PNP a mangpadpadakes kadagiti progresibo nga organisasyon babaen iti planado ken nadumaduma a wagas ken pamuspusan.
Makita dagiti kongkreto nga inaramid da kas kadagiti sumaganad:

Sakbay nga aggibus ti tawen 2009 ken inggana iti agdama, saan a bumaba iti tallo a platoon wenno maysa a company ti bilang ti tropa ti 5 ID iti tunggal ag-operasyon da iti munisipyo ti Tanudan, Tinglayan, Lubuagan, Pasil, Balbalan, Pinukpuk ken Upper Tabuk. Isaksaknap dagitoy a tropa kadagiti barangay a madalapus ti opersyon da a ti CPA, TMK, Bayan Muna, AnakPawis, Kabataan, Gabriela, Katribu party lists ket organisasyon kano ti CPP-NPA-NDF.

Idiay Ballayangon, Pinukpuk, kalpasan a butbutngen dagiti umili, naiyaramid ti miting idi April 9, 2010 babaen iti panangi-facilitate ni MSgt. Ferdinand Pay-ong iti 21st IB PA. Ditoy nga inlawlawag ni MSgt. Ferdinand Pay-ong a ti TMK ket organisasyon ti NPA. Iti daytoy a miting ket nagaramid da iti maysa a certificate a panangwaswas da iti Ballayangon Farmers Association a naibangon idi Februry 2010 a pinirmaan ti tallo nga opisyal ken uppat a miyembro ti nasao nga organisasyon.

Idiay Apatan, Pinukpuk: Ti Apatan Farmers Komboy Alluyon (AFKA) ket pilit a sinuktan ti 21st IB iti Apatan Farmers Community Association (AFCA).

Idiay Basao, Tinglayan ken Tanglag, Lubuagan idi March 10 ken March 27 ket nakaawat dagitoy a barangay babaen kadagiti barangay officials da iti agpada ti linalaon na a resolution manipud iti 21st IBPA ken pilit da nga ipapirma kadagiti barangay officials a ti barangay da ket nawayawayaanen iti insurhensya.

Kabayatan nga agtultuloy ti awan sarday nga operasyon militar iti upland areas, nasaknap met laeng ti nangisit a propaganda nga aktibidad da ditoy kapatagan ti probinsya kas makita kadagiti sumaganad:

• manipud nairugi ti panangipalkat kadagiti posters dagiti kandidato, dagiti posters ti Katribu, Liza Maza ken Satur Ocampo ti dagus a maik-ikkat ken ma-ab-abayan iti panangal-allilaw ken panangdadael nga isuda kano ket kandidato ti NPA;
• idi bulan ti Marso, nakaawat dagiti barangay captains/barangay officials ti barangay Ipil ken barangay Lacnog, Tabuk iti panangpangta wenno warning a surat. Ti nasao a surat ket awan ti pirma ken petsa na. Ti linalaon ti nasao a surat ket ibagbaga na a dagiti progresibo a kandidato ken party lists kas iti Katribu, Bayan Muna, Anakpawis, Kabataan ket instrumento kano ti NPA.

Binirngasan na pay ni Satur Ocampo kas berdugo imbes a ni General Palparan, a pudno a berdugo. Iti maudi a paset ti nasao a surat ket “ agserbi kuma daytoy nga umuna a pakdaar! (consider this as first warning)”. Talged Demokrasya ti signatory na.
• April 11, 2010, agarup alas-10 iti agsapa, dua a nakalugan iti multi-cab a pampasahero iti Bulanao-Dagupan ti nagiwaras iti adu a polyetos a panangdadael iti Katribu, Bayan Muna, Anakpawis, Kabataan party lists.

• tuloy-tuloy a panangpadpadakes kadagiti progresibo a party lists ken panangallilaw iti umili babaen iti programa a Soldier’s Hour kadagiti radio stations.

Umuna unay, kayat mi nga idanon a ti pannaka-ammo mi iti AFP ken PNP ket mangtartarawidwid iti linteg ken konstitusyon para iti kapya ken talna ngem tumutop ken maiparbeng kadi dagitoy nga ar-aramiden da? Saan kadi nga electioneering daytoy? Saan kadi a general assembly laeng ti mangbaliw iti aniaman a panagsukat ti nagan ken panangwaswas iti maysa nga organisasyon? Sino ni Talged Demokrasya a maus-usar a signatory iti panagpangpangta a surat? Kayat mi met laeng nga iwaragawag nga amin nga agkandidato agraman dagiti party lists ket dumalan iti requirements ken rekisitos ti Commssion on Elections wenno Comelec ken Comelec ti mangbasbas nu kwalipikado dagitoy. Kayat na a sawen, inikkan ti Comelec ti Bayan Muna idi pay laeng 1998, Anakpawis, Gabriela, Kabataan ken Katribu party lists iti pammalubos kas kwalipikado a party lists.

Saan a baro daytoy a paspasamak gapu ta nalawag kadatayo amin a daytoy ket silpu ken tuloy ti Oplan Bantay Laya II a programa ni presidente Gloria Macapagal Arroyo iti ubbaw ken desperado a panangpunas da iti insurhensya iti Pilipinas a nu sadino ket inraman ken imbilang da amin a progresibo a grupo kas iti Bayan Muna, Anakpawis, Gabriela iti listaan da kas miembro iti CPP. Agpanawagan ngarud ti Timpuyog dagiti Mannalon iti Kalinga (TMK), Cordillera People’s Alliance – Kalinga chapter ken Katribu party list kadagiti nadumaduma a grupo, sektor ken indibidwal ditoy probinsya a rimbawan tay amin ti buteng tapno kondenaren dagitoy a kinadangkok nga aramid, para iti tarigagay iti nadalus, napudno, ken nainkapyaan nga eleksyon wenno honest, orderly, peaceful election (HOPE). Parimbawen tayo ti kaugalian a panagrespeto iti pada a tao ken kanayon a panangitandudo iti karbengan tayo kas tao. # nordis.net