Ni BRENDA SUBIDO-DACPANO
www.nordis.net

WEEKEND AT THE FARM. (Manipud kannigid0 Emma Tuvera, ti nagsurat, Susan Agaid-Geronimo, Cathy de Guzman, Dhelia Gody-Lim and Josephine Dulay-Manalili (nakatalikod iti camera).

Atiddog ken pasikko-sikko ti kalsa nga agturong iti balay ni Mario idiay Calasiao. Namin-ano kami a nagdamag no sadinno ti ayan da Mario, namitlo kamin sa a napukaw. Haay.. sa wakas, nabirokan mi met laeng.

Iti masungad nga akinkannawan ket ti puon ti mangga a nagirig iti laud, adda iti sirok na ti pasagad a nakaluban ti laminated a langgutsi. Simmabat ni Mario kadakami a gagayyem ken ka-batch na manipud high school — siak, ni Jo, Cathy, Susan, Bambi, Nomer, Dhelia ken ni lakay na. Kimmamakam ni Ferdie idi pangngaldawen.

Nalammiis ti pul-oy ti angin nga immagek iti pingping ko. Nabang-aranak pay iti lammiis na manipud iti pannakasarang ti tengga’t aldaw nga init. Nagturong kami a naglinong iti pagtutugawan iti abay ti bahay kubo.

Nagpadaya ken panagyaman ni Mario gapu ta nakaruar ti balasang na a medtech. Nasangpetan mi dagiti kakabagian ni Mar nga agisagsagana kadagiti taraon. Naitaratar iti papag dagiti agkakadakkel a kardero. Madama met a maituntuno ti buslogan, bangus ken gurami.

Nagmerienda kami ti gisado a pansit bihon. Indasar met a dagus ni Mario ti pangibulon nga iced tea. Mayat ti istorya ken katawa mi bayat ti pannangan. Nabayag ngamin a panawen sakbay kami a nagkikita manen. Adu dagiti istorya a kailiw mi a mangngeg. Agbabalubal ti istorya ti tunggal maysa. Ti okasyon ket maysa metten a reunion mi.

Immuneg kami iti bahay kubo. “Nagmayaten, adda pay tiles na,” kinunak. Simmagpat kami iti kakaisuna a kwarto ket, na a, adda aircon na! “Nagsosyalen,” ti naggigiddan nga imbalikas mi. Napan kami iti tawa a nagparetrato imbag la a souvenir mi.

Inyayab dan ti panggaldaw. Naiplastar dan a pinagsisilpo ti tallo a lamisaan. Naidasaren dagiti agkakaimas a taraon. Adda tinuno a buslogan, paltat, bangus ken gurami. Nagsasaruno kami a napan naggao ti kanen mi. Ginagarak a ginao dagiti seafoods nga adobo a pusit, ar-arosep, ginettaan a rasa ken kilawen nga ikan. Adda pay kaldereta ken pinapaitan.

Kasla nagdalanan ti bagyo ti nanganan mi. Duma a talaga no Pinoy ti agpadaya ta kasla piesta. No saan mo a makontrol ti kanem, ay ket, marigatan kan a tumakder.

In-post mi iti social network iti internet dagiti retrato mi idiay talon. Apo unay ti apal dagiti ka-batch mi nga adda iti ballasiw-taaw. Adda met kano ti dalag ken paltat iti ayan da tatta ngem duma latta ditoy Pilipinas ta ti mangpaimas met iti pannangan ket ti istoryaan ken pannakilangen kadagiti gagayyem ken kakabagian. # nordis.net