Makan a la Pinoy: Misua
2 MIN READ
Ni BRENDA S. DACPANO
Nagrigat la ngaruden ti biag, nakarkaro manen a nakakaskas-ang itatta ta agsasaruno ti panagngina dagiti gagatangen ken gasolina. Inkiddaw ti maysa kadagiti kolumnista ti Nordis, a ni Art Boquiren, ti makan iti panawen ti krisis.
Naimpanawen nga agpayso ta nagbassit metten ti pakaigatangan ti sangagasut a pisos. Dua ket kaguddua laengen a kilo ti bagas ti magatang ti 100. Awanen ti mabati a pangsida.
Ti misua ken dadduma pay a noodles ket pleksible ken adu ti mairanud a mangan segun iti ikabil mo a sabaw na. Makalaka ka no gumatang ka ti maysa kahon a misua wenno ‘tay pang-wholesale ngem ti tingi. Ngem gapu ta agkirang ngarud ti kuarta, mabalinen ti dua a balkot a tingi. Sangapulo wenno 12 pisos ti maysa a balkot.
Simple laeng ti luto ti misua ken apagbiit ti luto na. Nanannanam no maigisa iti bawang ken sibuyas. Masagpawan ti maysa ilgat a pork chop, kiniddis a karne ti manok wenno pasayan a sanga-atado. Mabalin met a korus ti isagpaw tapno nalaklaka. Laukan ti aniaman a nateng nga adda iti arubayan yo wenno dagiti nalaka ita a panawen (no adda pay), kas ti wombok, pechay, sayote, kabatiti wenno bunga ti paria.
Ramen
2 balkot a misua
1-2 rakem a korus
3 ngipen a bawang, napitpit
1 sibuyas, naiwa a panggisa
1 bunga ti paria, naiwa iti diagonal
asin ken paminta a pangtimpla
sanga-tedted a mantika
flavoring mix wenno cube (optional)
Igisa ti bawang ken sibuyas iti mantika. No limmamuyuten ti sibuyas, ikabil ti paria. Igisa bassit ti paria santo bukbukan ti dua litro a danum. Pagbureken. Timplaan ti asin, paminta ken flavoring mix (no agusar). No naluton ti paria iti agarup 10 minutos, ikabil ti misua. Pagbureken iti 3 minutos. Adawen ken mabalinen nga idasar.
Daytoy a resipi ket mapakan na ti 8 agingga 10 a tao. Agbalor ti P7.00 ti tunggal maysa a serving wenno nalaklaka pay segun iti diskarte yo nga agtawar idiay tiendaan. #
