Makan a la Pinoy: Sinanglaw ken warek-warek
3 MIN READ
Ni BRENDA S. DACPANO
Idiay Vigan ti nakaramanak ti naimas a sinanglaw. Agdindinnamag a sadiay kano ti kaimasan a sinanglaw.
Gapu iti kinaladaw mi a nagriing (kaduak ti gayyem ko), nasadutan kamin nga agluto ti armusar. Naglayon kam’ laengen idiay tiendaan ti Vigan ta napan kami nagbirok ti panganan ti armusar ken pangaldaw. Rinikos mi ti tiendaan sakbay kami a nagturong iti intar ti karinderia. Napan kami iti kantina nga adu ti tao na, kasla naimas ti luto da ta adu ti kustomer. Sinirip mi dagiti taraon ket kasla naimas nga agpayso. Nagorder kami ti sinanglaw, hmmm… agas-asok nga inserbi da. “Ngem awan met ti tinidor”, imbagak iti serbidora a manarimaan nga agiw-iwa ti karne a pang-sinanglaw. Awan sa metten ti tinidor da ta nagtallikod kaniak sana impunas iti apron na ti tinidor a pangtudtudok na iti karne nga iw-iwaen na. Inawat ko ti tinidor sa kam’ nagkinnatawa iti gayyem ko. Inyarasaas ti gayyem ko, “inton maminsan agbalon tan ti kubyertos. Kunak met nga isu siguro ti pampaimas na daydiay. Ngem ita, saan metten siguro a kasdiay. Napan kami ngamin idiay idi panawen nga ipatpatakder da pay laeng ti dakkel a pasdek a tiendaan.
Simple laeng daytoy nga iluto. No ammo yo nga iluto ti pinapaitan ammo yo met a lutuen daytoy. Ti nagdumaan na laeng iti pinapaitan ket awan papait na daytoy ken daddadakkel ti ilgat na.
Ramen ti sinanglaw:
1/2 kilo a karne ti baka
1/2 kilo a lalaem ti baka (liblibro wenno rakrakipa, silet, kdpy a lalaem)
1 sibuyas, naiwa iti naingpis
1 laya, naiwa iti napino wenno paatiddog a naingpis
bawang, napitpit
2 kutsa a mantika
suka, asin ken paminta a pangtimpla
Preparasyon:
1. Ipaburek bassit dagiti lalaem, agarup 10 a minutos. Paik-ikan ken ibelleng ti naglambungan. Pabaawan santo ilgaten iti sag-dudua a pulgada ti kadadakkel na.
2. Iwaen met ti karne ti baka iti dua pulgada ti kadakkel na.
3. Isagana dagiti panggisa a rekado. Ipapudot ti dakkel a kardero a mabalin a pagangeran. Ikabil ditoy ti mantika. Igisa ti laya, bawang ken sibuyas. Isaruno nga ikabil dagiti lalaem ken karne. Ikiwar aginggana ag-brown bassit, agarup 15 minutos. Ikabil dagiti pangtimpla nga asin ken paminta. Patedtedan ti bassit a suka. No di yo kayat nga ikkan ti suka mabalin a perresan ti kalamansi inton naluton.
4. Ikkan ti naan-anay a danum a pang-anger. Angeren iti 1 nga oras wenno aginggana lumukneng dagiti lalaem ken karne. No adda ti pressure cooker yo mabibiit ta 15 minutos laeng ket naluknengen.
Naimas met ti luto dagiti Ilokano a warek-warek. Ti warek-warek ket awag dagiti Ilokano iti dinakdakan. Ti ammok a nagdumaan da ket maituno ti warek-warek ken ti dinakdakan ket uray saan nga ituno, ilambong laeng.
Ramen ti warek-warek:
1 kilo nga ulo ti baboy (mairaman ti utek na)
1-2 a lapayag ti baboy
1/4 a dalem ti baboy, nailgat iti naingpis
dila ti baboy
laya, 1a napitpit ken 1 a naiwa iti pino
sibuyas, 1 naiwa iti guddua ken 1 a naiwa iti pino
asin ken paminta a pangtimpla
Preparasyon:
1. Linisan dagiti karne, kuskusan dagiti lapayag santo ilambong iti 15 minutos. Ikabil ditoy ti napitpit a laya, asin ken sibuyas a naguddua. Iraman nga ilambong ditoy ti utek a naikabil iti cellophane. Paik-ikan ken pabaawan bassit. Isina ti utek. Sapsapuan ti bassit nga asin ken paminta dagiti karne. Ituno ti karne aginggana ag-brown bassit. Iwaen iti naingpis a medyo immaratiddog.
2. Iyuper ti dalem iti suka iti 20 minutos. Paik-ikan.
3. Iti dakkel a malukong, ikabil ti nalambong nga utek. Perresan ti kalamansi (segun iti kayat yo a kaalsem na) ken timplaan ti asin ken paminta. Ilaok amin ditoy dagiti ramen. Kiwaren. Naimas a laukan ti sili ti sairo.#
