Women's Front: Anibersaryo ti CARP
2 MIN READ
By INNABUYOG-GABRIELA
Iti 19 a tawen ti CARP, ket 19 a tawen ti kina-ulbod ken panangloko kadagiti mannalon. Awan pulos pagsayaatan a naited ti CARP kadagiti mannalon. Nakaro a panagrigat ken kontra-mannalon ken naipasaknap a panag-agaw kadagiti daga a suksukayen dagiti mannalon.
Pito iti kada 10 a mannalon ditoy pagilian ti awanan bukod a daga a suksukayen. Uppat iti kada pito a mannalon ket obligado nga agutang iti usura tapno adda panggastos iti panagtalon.
Ipanpannakel ti gobyerno dagiti programa na iti uneg ti CARP ngem saan a daytoy ti mangisigurado a maited kadagiti mannalon ti daga a suksukayen da. Daytoy CARP ti mangiduron kadagiti appo’t daga, “developers” a mang-agaw kadagiti daga a suksukayen dagiti mannalon, uray no adda Certificate of Land Transfer (CLT) ken Emancipation Patent (EP) ti mannalon babaen ti Presidential Decree #27 ken Certificate of Land Ownership Award (CLOA), gaputa ta kinansela mismo daytoy ti gobyerno. Adu’t pakakitaan a ti CARP ket di na itantandudo ti interes dagiti mannalon.
Iti intero a pagilian, adda ibagbaga ti DAR a 1,784 nga Agrarian Reform Communities (ARC) kano. Saan met a daytoy ti mangted iti karbengan kadagiti mannalon a tagikuaen dagiti daga a suksukayen da. Manipud iti gobyerno, “As of December 2005, the Department of Agrarian Reform has secured the land tenure of 2.13 million farmers through the distribution of 3.8 million hectares of agricultural lands nationwide.” Pammarang laeng daytoy a datos tapno maibaga da a naballigi ti reporma iti daga iti rehimen ni GMA. Imbaga ti DAR a 1.3 milyon nga ektarya ti saklawen ti CARP, isu a kasapulan kano nga ikkan ti extension inggana agtapos ti tawen 2008, a kas naibaga met laeng ni GMA.
Ditoy Kordilyera, agtultuloy ti panang-agaw dagiti dadakkel a pagminasan iti kadagaan dagiti nainsigudan nga umili. Mano manen nga ektarya ti kataltalunan ti madadael ken malayos, ken karayan ti masabidungan gapu iti operasyon dagitoy a pagminasan a tagikua dagiti lokal ken ganganaet a kapitalista.
Dagiti mannalon a mangpataud iti taraon ti pagilian ti kaadduan a biktima ti agtultuloy ken nasaknap a pulitikal a pammapatay gaputa napingetda a lumaban a mangsalaknib iti daga. Manipud nagtugaw ni GMA kas Presidente, nasurok 430 a mannalon, mangngalap, mangmangged talon, nainsigudan nga umili, babbai ken ubbing ti napapatay.
Ngem iti baet ti kinadursok ken panangipamuspusan ti rehimeng GMA nga ipatungpal ti programa na nga anti- mannalon ken pabor kadagiti ganganaet a kapitalista ken agro-corporation, sipipinget met dagiti mannalon, kanayon dagiti babbai ken ubbing a mangsalaknib iti daga a suksukayen da.
Ngarud, saan a rumbeng a rambakan ti Anibersaryo ti Comprehensive Agrarian Reform Program (CARP). NO TO CARP EXTENSION! #
