Makan a la Pinoy: Sapin-sapin nga ayat

Ni BRENDA S. DACPANO

Maysa a pagay-ayat ko iti makan, malaksid iti pannakakontento; ket ti ritwal ken ayat a kakuyog daytoy iti panangisagana ti taraon. Uray kasano kasimple ti makan no naisagana daytoy a napnuan ayat ket naimas latta.

Ti makan ket mangummong kadagiti tattao, gundaway tapno makilangen ken makichika. Mapaneknekan daytoy iti opisina ti Nordis. Maysa aldaw iti makalawas maummong ti gistay amin nga staff ti Nordis. Malaksid iti panangisubmitar kadagiti news ken column articles, adda ti masegseggaan a “taste test”. Kadawyan ngamin a no ania ti recipe a mai-feauture ditoy a seksyon ket isu met ti mailuto.

Ita a lawas, sapin-sapin ti recipe tayo. Iti nabiit, malagip ko ‘tay sapin-sapin a kailiw ko a kanen. Awan sa metten ti agar-aramid iti pangtagilako ta natrabaho ngamin. Pinadas ko ti agbirok idiay tiendaan ti Baguio ngem awan ti nakitak. Ninurnor kon dagiti bangketa iti tiendaan iti agsapa ta bareng no makakitaak ngem awan latta. Adu ngamin, no kua, ti aglaklako kadagiti kankanen nga aggapu iti kabangibang a probinsya ti La Union ken Pangasinan. Adu, a, dagiti inkiwar, linatikan, puto, suman ken kutsinta ngem awan tay sapin-sapin. Segun kadagiti mabasbasa, daytoy a kankanen ket naggapu iti Abra. Nalaka laeng nga aramiden daytoy. Adtoy ti kasapulan ken pamay-an.

Ramen:

1. 1 ½ tasa diket, giniling
2. ½ tasa galapong (bagas)
3. 2 ½ tasa asukar a puraw
4. 3 tasa ube, nalingta ken minasa (mashed)
5. 4 tasa getta ti niog (manipud iti 2-3 a niog)
6. 2 lata (dakkel) ti condensed milk
7. food coloring a violet ken yellow

Pamay-an:

Paglalauken amin a ramen malaksid iti ube ken food coloring. Pagkatluen. Ti maysa a kakatlo, inayon ditoy ti ube. No kurang ti kolor na, nayunan ti violet a food coloring. Ikiwar a nalaing. Iti maysa pay a kakatlo, laukan ti yellow a food coloring. Kiwaren a nalaing. Iti nabati a kakatlo, awan ti inayon ditoy, kiwaren laeng a naimbag.

Lanitan ti nagbukel a baking pan. Ap-apan iti bulong ti saba a nailanat. Ibubok ditoy ti mixture ti ube, iplastar a nasayaat. Kaluban iti katsa wenno cheese cloth. Pasengngawan iti 30 minutos wenno aginggana maluto. Ibukbok ti mixture nga adda yellow food coloring na iti rabaw ti ube. Kaluban manen ken pasengngawan iti 30 minutos. Ibukbok ti maikatlo a mixture (puraw). Kaluban ken pasengngawan manen iti 30 minutos. Adawen ken parabawan ti ladek. Mabalin a mainayon nga iparabaw ti sinam-it a macapuno ken langka.#